لسه بادري

ياه كده خلص بجد زعلانه جدا كل سنه بيمشي اسرع من السنه اللي قبلها يالاه المهم نستناه السنه اللي جايه في ظروف احسن المهم ان زي امبارح السنه اللي فاتت توفت صديقه امي المقربه جدا اللي كنت بعتبرها خلتي التانيه الشيءالعجيب ان امس اتوفت مامتها السنه دي شيئ غريب البنت ومامتها يموتوا في نفس اليوم علي سنتين بجد غريب قوي والمهم ربنا يرحمهم المهم كلها كام يوم و العيد يجي بس مش فارحانه مش عارفه ليه يمكن عشان ده اول عيد من غير جدي بجد زعلانه قوي وحشني جدا.....المهم ان البلوج وحشني قوي ووحشني ادخل واعلق للناس وكده بس هي الكليه ما فيش غيرها اللي بعداني عن الناس وعن كل حاجه بس ان محتاسه في المشاريع بتعتي آه ودي بعض الصور للحاجات اللي بعملها دراسه المهم كل سنه وانتم طيبين وعييييييييييييد سعييييييييييد

معلش مش هينفع احط الصور لانها ببساطه مسحتها بغبائي معلش خيرها في غيرها

التاج

معلش يا شمعه معلش يا بنتي مشفتش البلوج ومعرفتش انك بعتي لي التاج وكنت مستنيه النتيجه بس اخيرا طلعت واكمان اصلي اليومين دول مشغوله قوي كل يوم بروح التدريب اينعم مش بنعمل حاجه و المهندسين في عثمان منفضين لنا قوي ..............المهم التاج ده حساه حلو واحسن من اللي قبله المهم

التاج:

هل انت راض عن مدونتك شكلا وموضوعا:

يعني بس اول ما عملته كان نفسي اعمل كل اسبوع شكل للبلوج بس قلت كده الناس عمرها ما هتعرف بلوجي

بس دلوقتي راضيه وعجباني صوره نيمو ناقص بس اعمل لنكات للناس اما بالنسبه للمضمون فانا بتعمد ماقراش بعد مااكتب لاني ممكن امسحه كله لاني صعب جدا ارضي عن اي حاجه انا عملاها ويمكن اللي يأكد كلامي الاخطاء الكتتتتتتتتتتتتتتتتتتتتتتيييييييييير اللي عندي معلش؟!!ك

هل تعلم اسرتك الصغيرة بأمر مدونتك؟

نعم كلهم عارفين بس مافيش غير بابا ورضوي اختي الي بيدخلو اصل همه مدونين برده

هل تجد حرجا ف ان تخبر صديقا عن مدونتك ؟

احيانا بشعر بالخجل او مش الخجل بحس ان في ناس معينه مش هتفهم الفكره او تقدرها وممكن يستهزؤا بيها وانامش بحب كده

هل تعتبرها امرا خاص؟

لا مش للدرجه

هل تسبب المدونات بتغير ايجابي لافكارك؟اعطني مثال ف حالة نعم.؟

آه ه طبعا حسيت ان الدنيا كبيره قوي وفي ناس عندهم افكار مختلفه عني مكنتش اعرف عن الناس دي حاجه خالص بتوضيح اكتر عالم المدونات وسع دائرهافكاري اكتر

هل تكتفي بفتح صفحات من يعقبوك بردود ف مدونتك ام تسع لاكتشاف المزيد؟

لا طبعا بحاول اعرف بلوجات اكتر بس ده ما يمنعش اني اشوف البلوجات بتاعه الناس اللي بيعلقولي بردك

ماذا يعني الك عدد الزوار ...هل تهتم بوضعه؟

طبعا بفرح جدا لم بلاقي ناس كتير معلقه عندي وكان نفسي اعمل عداد بس معرفتش وكنت خايفه في الاول لم اعمله وملاقيش حد دخل كان ممكن يجيلي احباط واقفل البلوج عشان كده مكانش عندي اصرار اني اعمل عداد

هل حاولت تخيل شكل اصدقائك المدونين؟

اه حاولت كتير بس انا عموما بحب اتخيل اشكال للناس اللي بسمع صوتهم او بيتحكيلي عنهم بس بدايق قوي لم يكون شكلمه مختلف عما تخيلته خالص وده دايما اللي بيحصل؟؟!ا

هل ترى فائدة حقيقية للتدوين

بجد اه التدوين بيعمل حاجه ذي التفريغ للمشاعر وللاحاسيس سواء حلوه او وحشه كمان الواحد بيحب دايما يطلع اللي جواه وكمان في ناس مش بتحب تحكي لحد اللي بيحصله علشان رد الفعل فالتدوين احسن علاج ليهم (بس يلغوا التعليقات)بس

.
هل يزعجك وجود نقد ف مدونتك ام تعتبره ظاهرة صحية؟

احيانا ده بيضايق خصوصا لم احس ان الناقد مش فاهم الموضوع كويس

هل فكرت بمصير مدونتك حال وفاتك؟

طبعا اكيد هتكون مدونه مشهوره لاني هكون صاحبه اول مدونه صاحبتها تموت وبعدين اكيد رضوي هتدخل عليها وكل الناس اللي يعرفوني حاجه حلو صح ؟؟

آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟

ايه هو ده برنامج ما لا يطلبه المستمعمن ماشي علي العموم ممكن احط اي اغنيه لفيروز زي سألتك حبيبي اوسلملي عليه

او رجعت الشتويه. بما اني بحب الشتاء جدا جدا جدا

اكتب اسماء خمسة تمرر ليهم الدور

رضوي, هكذا انا

عمرو.ما بدي لي

ريهام انتمتي اول ماتعمل البلوج (قريبا)ولوانها زعلانه مني ليه مش عارفه

و

لا و الف لا

لا للاحتلال في لبنان وفلسطين

ولا لاسرائيل و امريكا

ولا للحتلال في العراق

ولا للظلم علي البلاد

ولا للظلم و القهر للعباد

ولا للاستعباد

و لا للعنف مع ال........و

و حسبي الله ونعمه الوكيل

لا دي ناس مفيش غير الدم

رغم اني مش بحب السياسه و دايما اقول الباب اللي يجيلك منه الريح سده و....بس المره دي قله ادب قوي مش حرام كل الناس اللي بتموت دي ايه اسرائيل عايزه ايه مفيش غير الدم عندهم و اللي يغيظ ان في ناس فرحانه ان حزب الله بيضرب اسرائيل ماشي حلو ماقلناش حاجه بس حذب الله قتل كام واحد 5 ؛6؛010 عارفه ان الارقام اللي بيعلنوها مش حقيقيه و ان اللي ماتوا اكتر حتي لو 1000 كام واحد اتصاب وتقتل من ساعه اللي حصل ما حصل نصف مليون مواطن او اكتر من بنهم اطفال اتحلرموا من اللعب و الحياه و ام اتحرمت من اولادها و اولاد اتحرموا من امهم و هكذا كل ده و الناس عايزاهم يحاربوا انا مش بقول ان احنا نحارب لا في حاجات كتير ممكن نعملها من غير ما نحارب انا عارفه ان مش سهل كلمه يلا نحارب دول اخواتنا هم صح احوتما بس الموضوع اكبر من كده لكن ممكن السعوديه وكل دول الخليج تهدد اسرائيل بقطع البترول عنها لو ما وقفتش الضرب زي ماعملوا في 73 ولا الحاجات دي كانت زمان وبس بلاش حاكايه البترول بلاش طب علي الاقل يعقدوا جتماع لجميع المل العربيه حتي اجتماع الفمه مش عارفين يعملوه و تقولوالي مش هيجي اليوم ده علينا و علي الباقيه تدور الدوائر ...... ربنا يستر و يكون الواحد مات قبل اليوم ده

حد يصدق ده

بجد في حد يصدق ان الصورتين دول لنفس البلد بس الفرق في التوقيت 10ايام فذلك المنظر الجميل و السماء الصافيه
و البحر الرائع يتحولون الي الخراب و الدمار والادخنه الخانقه و ذلك المنظر المؤسف ولكن لا عجب ولا عجاب فتلك هي الحقيقه هكذا اصبحت لبنان و كل ماقامت به الحكومه المصريه كتر خيرها بعتت تجيب المصريين من هناك والله تعبوا نفسهم فين العروبه واحنا باد واحد خلاص كل دي اوهام واحلام بس انا واثقه ان اليوم ده هيجي علينا وهنحس باللي هم فيه و ساعتها هفكركم بس لو كان سعتها شبكه النت مضربتش بصاروخ او لو كان بتنا ذات نافسه مضربش بس ههحاول اني اكتب بس بجد لا زم نعمل حاجه انا مع حكايه ان احنا كانا يوم 27\7 نكتب كلنا بوست ضد الظلم و الاحتلالفي فلسطين العراق و لبنان مش عارفه ليه كل اللي بكتب عن الموضوع ده بينسي العراق ايه هي اتحررت و انا معرف ولا اللي هناك دول يستحقوا اللي هم فيه علي العموم لازم يكون لنا صوت ونقول لا للاحتلال علي العرب كلهم و يسقط الظلم و القهر علي كل انسان عربي في العالم اي كان مكانه و اي كان اللي ظلمه حتي لو كان منه......!!و

افتقادات

الافتقاد.... الافتقاد لاي شيئ اشعر بالافتقاد لاشياء كثيره ..اولا افتقد الاحساس بالسعاده ليس بالنسبه لي لا ولكن بالنسبه للشعب فآخر مره الشعب فرح فيها كان عند الفوز بكأس الامم الافريقيه اليست بالفتره الطويله .... نعم و لكن لا يوجد شييء مفرح لا يوجد اي شيئ يتغير الا الاسعار و خصوصا اللحمه و كمان التنسيق هما الاتنين بيغلو و لا يرخصوش ابدا .....اما عن باقي الاشياء مثل الاخبار في التلفزيون فهي لا تتغير دائما نسمع عن اعداد القتلي في كل مكان فلقد افتقدت ان استمع الي اخبار سعيده حتي و لو في الدول الاخري فالعالم اصبح كئيب و اشعر ان نهايه هذا الكون قد اقتربت و لكن لا احد يشعر بذلك ... نترك السياسه. و نتحدث عن الشباب الذي يفتقدكل شيئ فحتي الاحساس بالحب يفتقده الشباب فالان الشباب اصبح عاجز عن الحب او يتحول الحب الي اشياء للتسليه ليس الا فنحن نفتقد الحب الذي كنا نراه في افلام عبد الحليم و فاتن الحمامه و سعاد حسني و رشدي اباظه كان الحب عندهم شيء مقدس و جدير بالاحترام اما الان فأفلام الحب للأسف تأخذ في الانحدار و اصبح الشباب في حالخ تخلي عن احلامهم و حبهم فليقول لي احد عن فيلم في هذا الصيف او اللي قبله شعر فيه بالحب الذي يجب ان يكون ...... كيف نجد الحب و نحن تحولنا الي اشخاص لا يحبون سوي انفسهم فلينظر كل منا الي الشخص الذي بجواره ليجده دائما في حاله ترقب منه اصبحنا بلا ثقه في انفسنا او بعضنا البعض فالجميع يشعر بالافتقاد لتك الزمن الجميل منذ خمسين عاما حيث كانت الحياه افضل بكثير كم تمنيت العيش في ذلك الوفت ومع تلك الناس الطيبين حقا و لكن الان ليس امامنا سوي ان نفتقد ذلك و نحن نشاهد الافلام القدبمه الابيض و اسود........,.!!م

حوار بيني و بينها

افتح الكمبيوتر و اقرر ان اكتب علي البلوج ابدأ في الكتابه .... انتظري ايه لماذا لا تكتبين قصه .... مانا اكتب قصه .!! نغم تكتبين قصه الكل يكتب قصص فلم لاتكتبي .. و لكني لااستطيع كتابه قصه ... لماذا لاني لست كاتبه فأنا مهندسه والمهندسين لا يكتبون قصص ... اهذا هو السبب الوحيد لان لاتكتبي قصه .؟ لا و لكن اعتقد انه سبب مقنع و ايضا انا لااحسن سوي رسم الاوح الهندسيه.... نعم اعرف ذلك و لكن الكل يكنب لم لا تأخذي قصه من احد المجاهيل و تكتبيها كأنك انت التي كتبتها .؟؟؟ لا انا اسرق لا ماذا لو احد قعل بي مثل انا افعل و اخذ احد مشاريعي ونسبها لو لا لا لااتخيل ان افعل ذلك بأحد .. حسنا اذا كنت تصرين علي الكتابه سوف افعل ذلك و لكن بمفردي .. و يمكنك الجلوس لتقيمي ..... سوف ابدأ ......................................... امسك القلم و اضغط علي سنه و استجمع افكاري علي الورقه . ما رأيك هل تبدوا القصه كالقصص الاخري ؟؟ ننننننعم و لكن انت لاتمسكي بقلم او ورقه فأنت تكتبي علي الكمبيوتر !!!! آه ....صحيح و لكني اري ان تلك البدايه جيده للقصه و سوف اكملها ......... حسننا و لكن عن ماذا سوف تحكي فيها ؟؟؟ لا اعرف ننعم سوف احكي عن الفيلم الذي شاهدته امس الفيلم الذي اثار ضجه كبيره و هو لايستحقها نعم و اكنب عن الواقع المرير الذي يمثله الفيلم ........ و لكنك هكذا سوف تغضبي الناس و الآراء سوف تختلف معك ... نعم ربما انا الوحيده التي تري ذلك ولآخرون يروا العكس ماذا افعل , و لكن من حقي ان اقول واكتب ما اريد دون ان يقيدني احد هذا حقي ...........نعم .....وانت تقيديني ابتعديي عني واتركيني كي اكتب بحريه واعبر عن كل ما اراه سيئ في هذا العالم ابتداءا من بائعي الخضار المزعجين انتهاءا برئي كفي كفي ماذا كنت هفعل بنفسي تلك المجنونه تريد ان تدمرني انا لست من سوف يحل الكون لن اكتب قصه لن اكتب لن فأن مهندسه وابتعدت عن التنفيذ في المواقع لانجنب المشاكل فتريد تلك الشريره ان توقعني في الاخطر منه لا لا فأنا مهندسه فقط ولا اريد كتابه اي شيئ فقط ارسم لوحي الهندسيه .....ر

اطفال الزمن ده؟؟؟!!!..؟

اكتشفت ان الاطفال في هذا الزمن لم يعدوا اطفال فكل ما يشغل افكارهم هو الحب و الزواج و الاشياء الشبيه بذلك ولابد وان يكون لكل طفل بنت بيحبها و هي دي فتاه احلامه و الي معندوش بنت يبقي عيل !؟طب انا اعرف ولاد 20سنه وعمره ما كل بنت في مواضيع الحب و الحاجات دي معني كده انه عيل ولا انه انسان بيفكر بعقل اي نعم عقل زياده شويه لكن شايف انه مش وقت الكلام ده لكن الاطفال ليه يفكروا بالاسلوب ده اكيد بسبب الاعاني اللي علي الدش و طول الوقت ولد بيحب بنت بيبوسها حاجات مينفعش اطفال في السن ده يشوفوها بس الزنب مش زنبهم المفروض الاباء و الامهات يخلوا اولادهم يعناوا حاجه مفيده اكتر من انهم يتفرجوا علي التلفزيون انا مش بقول ان اتلفزيون وحش لا بس هو الموضوع محتاج شويه تنظيم و اهتمام يعني ممكن يتفرجوا علي الكرتون البرامج علي المسلسلات يعني الافلام بس مش اي فلم لازم يكون في اختيار من الوالدين طيب لو ماشافوش التلفزيون يعملوا ايه مش ممكن هيخرجوا كل يوم لا لكن ممكن يرسموا مكن يلعبوا رياضه الحاجات دي مش محتاجه امكانيات مش لازم يكونوا بيعرفوا يرسموا او يروحوا لحد متخصص في الرسم لا ممكن انهم يشفوا الرسومات من الكتب و المجلات بلاش نقول يقرؤا علشان نكون واقعيين اغلب الاطفال مش بيحبوا القراءه لكن الرسم حاجه تانيه اما الرياضه مش لازم يروحوا نادي للتدريب ممكن يعملوا تمارين رياضيه و ايروبكس في البيت و التماريت موجودخ علي موافع علي النت كتير ....ب

بس انا مش بقول الكلام ده علشان انا ضد ان الاطفال يحبوا لا طبعا انا مع ده لانهم من خلال ده بيكتسبوا خبرات مهمه جدا لكن المشكله انهم فاكرين ان الحب عيب و قله ادب فبيحبوا من ورا كل الناس زي اللي بيسرقوا واللي بيقوللهم للاسف اطفال زيهم علشان كده لازم يفهموا ان الحب مش عيب لكن كل حاجه و ليها وقت و لو حسوا انهم بيحيوا حد يسالوا نفسهم و بعدين ؟!1!!!؟؟

اخر مره

اوعدكوا انها تكون اخر مره اكتب عن مشروع المعرض بتاع الكائنات البحريه الا اذا فاز بجايزه فالمواقع التانيه هتكتب عن الانجاز اللي محدش عمل زيه بس علي العموم ان عملت للمشروع ده ماكيت و لان الدكاتره انبهروا بيه و كل اللي شافوه اعجبوا بيه و بفكره عمله ... اولا احب اشرح المشروع :اول عنصر هو صاله العرض و مساحتها كبيره قوي بتاع 1500 متر مربع و دي مساحه لازم لها نظام انشائي مختلف يستطيع تحمل العرض الكبير و يلائم نوع المعروض فاخترت نظام المباني المنفوخه و هو نظام في فكرته يشبه البالونات المنفوخه و ده اللي اوحي اي بفكره الماكيت بتاعي فعملت جسم المبني بالبالونات . تاني جزء في المشروع كافيتريا و لازم تكون داخل المعرض لكن انا معماتش كده خلتها مفتوحه في الهواء و مغطاه بمظله كبيره و كان مبرري اللي اقنع الدكاتره اني اخليها بره و جود عرض اسماك الدولفين في البحيره الصناعيه و ده واضح في الماكيت و اخيرا الجزء الاداري و ده جزء مستوي و مفهوش مشاكل ... انا حاولت اشرح علشان اللي مافهمش من الصور يفهم من الماكيت و المفاجاه الكبيره ان الماكيت جاب 90 من 100 و دي درجه ما كنتش اتخيلها ابدا و خلتني احس اني ممكن اكون معماريه بجد ياريت تكتبوا لي رأيكم و احساسكم لو شفتوا مبني زي ده في الشارع هتدخلوا و لاه لا ؟؟؟؟؟

بما انه

بما اني في كليه ممبترحمش بشهاده كل الناس و بما اني عندي امتحان يوم الخميس خرسانه وبما اني عندي امتحان تاني يوم الاحد وبما ان لوحه هتتسلم يوم الاحد مع الامتحان و بما ان تبيض المشروع من اليوم و بما ان التسليم يوم الخميس بعد القادم و بما ان النتيجه الاسبوع ده وبما اني عدت المشروع اربع مرات الي الان و لسه مرستش علي الفكره و بما ان امتحان التربه فبل تسليم المشروع بيوم وبما ان د. اسامه الباز جاي بكره الكليه لمناقشه الاوضاع الحاليه ,. اوضاع ايه الامتحانات ولا زنقه المشاريع ولا زنقه المرور اللي هيعملها علشان يجي الزمالك و لا ازمه بيع عمر افندي و لا انفلونزا الطيور و لا المياه الملوثه و لا الحكومه الملوثه ولا ولا ولا..,,,..,,,,,,و بما اني خنقتكم معايا وبما اني مشغوله جدا و مهيسه جدا و مستعده لاي فيرس اكتئاب او ما شبه فعشان معديش حد ان هبعد عن الكمبيوتر شويه وعن البلوج 3شويات لحد الامور ما تهدي .؟

بريق

بعض الناس بنلاقي ان عيونهم بها لمعان (بريق) ناس منهم عنيهم زكيه قصدي ان همه ازكياء وزكائهم بيبان في عنيهم و ناس تانيه العدسات عامله شغلها لكن البريق اللي بتكلم عليه غير كده خالص التاني بريق من نوع تاني اسمه بريق الحب بجد كذا حد كان قال لي ان اللي بيحب بيتعرف من عنيه و زي الافلام ما بتقول .بس مكنتش بصدق الحوارات دي بس الموضوع اختلف بجد ان شفت اللمعه دي فعنين ناس شفتها فعنين رضوي اول ما عرفت عمرو و ماكنتش حكيلي اي حاجه بس عنيها فضحتها و شفتها فعين صحبتي لم اتخطبت مش عارفه اللمعه دي بتيجي امتي انا من وجهة نظري ان اول ما الواحد يبدأ يحب و اول ما يخطب او تتخطب لكن بعد كده بحس ان اللمعه بتقل درجه درجه . بس اكيد في سبب لوجودها واكيد في سبب لاختفائها مش عارفه بس انا بستمتع لم بشوف اللمعه دي قوي .بس في ناس تحس ان في عيونهم البريق ده بس بيكون حزن شديد ومكتوم بس ده لم بشوفه بحس بحزن الشخص ده قوي بس المشكله بتبقي اني مش قادره اعمله حاجه وده اللي بيخنقني . و لاخر حاجه اللي مش بحبها الناس اللي عنيهابتكون مطفيه لانهم بيحسسوني بالغباء معلش بس ده اللي بحس بيه.... ا

كلاب الزمالك...!؟

بما ان كليتي في الزمالك فأنا يوميا بمشي في نفس الشوارع وبقالي علي الحال ده 3 سنين فطبعا عرفت سكان الشوارع المحيطه بالكليه وطبعا من ضمنهم الساده كلاب الزمالك كل يوم الصبح الساعه 8 صباحا العن الكليه اللي تخليني اصحي بدري زي طلاب المدارس و انا اللي كنت فاكره اني لم ادخل الكليه هصحي متأخر ما علينا المهم الساده الكلاب يخرجوا في تمام الساعه التامنه يتجولوا صباحا لاستنشاق الهواء النظيف و معاهم البودي جارد بتوعهم قصدي الحارس كل واحد ساحب وراه شاب محترم كل وظيفته انه يفسحه وسيبه يقف في الحته اللي تريحه و مش مهم الناس اللي ماشيه علي الرصيف و بيخافوا من الكلاب زي حلاتي يمشوا في الشارع امال الرصيف اتعمل ليه ..؟ قالوا لي عشان الكلاب طبعا تمشي وتتبول معلش اللفظ مش ظريف بس ريحت الرصيف مش اظرف حتي لو متشرفتش صباحا برؤيه الكلاب اتشرف بمخلفاتهم . الأهم من كل ده الحارس اللي ماسك كلب من الحذام بتاعه اللي هو نفسه مش لابس واحد في البنطلون بتاعهزمن جميل زمن فيه الكلاب هم الساده (الكلاب بكل انواعها...) و الناس الفقره هم الكلابالي يخدموهم يعني واحد زي ده كل مهتم وكل شغله في الدنيا يحافظ علي ميعاد خروج الكلب وميعاد... يعني اهله صرفوا علي تعليمه علشان تكون دي شغلته....!؟مهما كان نوع تعليمه حتي لو دبلوم برده حرام بجد لو حد عنده تفسير للموضوع ده يقول لي. ؟