احلام الناس

في لحظه تأمل من لحظات تأملي التي كثرت مؤخرا اكتشفت ان التأمل حاجه جامده جدا بجد يمكن في ناس كتير هتستغرب وناس اكتر بتعتبر التأمل ده للناس الرخمه المعقدين بس مش هقدر الومهم لاني كنت واحده من الناس دي لحد مده قصيره وانا في الاشاره اي اشاره رخمه بقف فيها كتير وخصوصا في الزمالك علشان كليني هناك بتفرج علي العربيات والناس اللي فيها وهم سرحانين وتخيل بيفكروا في ايه واحلام كل واحد يعني اللي معاه عربيه سيت ومطلعه عينه نفسه يجيب عربيه زي بتاعت الواد اللي جمبه عربيه ايه جامده من العربيات الميتالك المنفوخه الجديده وتكيف وكده .....واحد تاني بتاع العربيه الميتالك الجامده بيحلم البيوم اللي يجيب فيه السواق علشان يريحه من السواقه وقرفها و......وفي شخص ماشي اقدام العربيتين وبيحلم انه يجيب عربيه او حته تكتك يرحمه من قرف الميكروباص وزحمه الجيزه الساعه2 ........لا ولسه البنت اللي واقفه ومضايقه قوي علشان كلمت السواق علشان يروحها ويا حرام اتأخر شويه علشان الطريق زحمه .......وبعدين البنت التانيه اللي بتحلم ان صاحبها يجبلها هديه جامده في الفلانتين علشان لان لسنه اللي فاتت جابلها هديه عبيطه وصحبها اتريقوا عليها.......ولسه البنتين اللي في الميكروباص اللي بيحلموا ان يوصلوا بسرعه من الزحمه ويخلصوا من رخامه الولاد اللي ركبين جنبهم والراجل التخين اللي حشرهم وكمان في الولد اللي واقف بيحلم بالبنت اللي هيقابلها ويحبها بس عنده مشكله صغيره انه معندوش شقه ولا شغل بس بردك بيحلم بالحب والست اللي بتحلم ان جوزها يرجع يوم من الشغل رايق ويخرج معها كازينو الحمام زي ما كان بيعمل زماااان والراجل اللي بيحلم يلاقي مراته قاعده مستنياه في البيت مش في النادي مع اصحابها والبنت اللي بتحلم بالشاب اللي يحبها ويتجوزها لانها عمرها ما حبت حد ولا انحرفت و بدور عليه في كل واحد تقابله والست الغلبانه اللي بتحلم باليوم اللي تجيب فيه الغساله علشان تغسل هدوم العيال علشان تعبت خلاص والبنت اللي بتحلم تجيب الموبايل لان اصحايها كلهم في الجامعه معاهم الا هي والولد اللي بيحلم يصاحب بنت روشه من البنات بتوع مامي وبابي و العربيات الجامده واللي بيحلم ان الواد يدخل هندسه وقاعد يدفع دروس قد كده و في الاخر يتخرج وما يلقيش شغل والي واليي وبيحلم ويحلم و في الاخر اقول ........................ابتسمي انت في الدنيا؟